Nú verða leiðreglurnar um sóttarhald herdar fyri fólk, sum ferðast til Føroya. Hetta er fyri at forða koronasmittuni at sleppa inn aftur í føroyska samfelagið.

Herdu mannagongdirnar innibera, at øll sum ferðast til Føroya, fáa ein faldara við greiðum boðum um at fara í heimauppihald í 14 dagar. Tey ferðandi verða eisini framhaldandi biðin um at lata myndugleikunum persónsupplýsingar at nýta sum partur í ”smittuuppsporingini”og soleiðis at sóttarhaldstoymið sum nakað nýtt eisini fer at seta seg í samband við tey fyri at vita, hvussu tey hava tað í leypi av heimauppihaldinum.

Faldarin inniheldur kunning til ferðandi á føroyskum, donskum og enskum. Les faldaran her. 

Eftir 14 dagar í heimauppihaldi, kunnu øll ferðast frítt í Føroyum, men sjálvsagt við virðing fyri almennu tilmælunum um frástøðu og reinføri.

AT FARA Í HEIMAUPPIHALD INNIBER, AT

• Tú ert heima við hús og kanst vera saman við familjuni.
• Tú fært ikki vitjan.
• Um tú skalt arbeiða, skal tað vera heimanífrá.
• Tú kanst fara túr í egnum bili og vera úti í náttúruni, har onnur ikki eru. Halt teg frá øðrum.
• Minst til eisini at halda frástøðu og hava gott reinføri, tá tú ert heima við familjuni.
• Tvær ferðir setir sóttarhaldstoymið seg í samband við teg. Tú fært ein kontaktpersón í toyminum.