Ferðing

(Dagført 26. august 2021)

Legg til merkis, at henda síðan hevur bara upplýsingar um ferðing til Føroya. Hevur tú brúk fyri upplýsingum um ferðing til onnur lond, mást tú venda tær til myndugleikar har.

Ferðandi til Føroya

Tá ið tú ferðast til Føroya, eru somu reglur galdandi, sum tá ið fólk ferðast til Danmarkar. Hetta ger seg eisini galdandi fyri búsitandi í Føroyum, sum koma heim aftur av ferð uttanlands. Seinastu vegleiðingarnar kunnu lesast her.

Tilmæli um kanningar í sambandi við ferðing frá 1. september

Frá 1. september verður mælt til, at fólk lata seg kanna tveir dagar áðrenn fráferð til Føroya og tveir dagar aftaná komu til Føroya. Heitt verður á fólk um at vera serliga varin inntil tey hava fingið svar uppá kanningina annan dagin eftir komu.

Transit

Hevur tú verið í transit í einum øki (ferðast ígjøgnum) er tað smittustøðan (liturin) í upprunaliga fráferðarlandinum, sum er galdandi, tá ið tú kemur (aftur) til Føroya. Transit merkir, at tú hevur ikki verið í samband við fólk í landinum/økinum, sum tú hevur ferðast ígjøgnum. Hetta merkir til dømis, at er landið, sum tú ferðast ígjøgnum, reytt, so er tað sera týdningarmikið, at tú ikki fert út millum fólk har, tí so verður reyða landið at rokna sum fráferðarland, tá ið tú kemur til Føroya.